انا مواطن صالح

انا مواطن صالح

صابر

كادح

صابح .. متوكل على ربى

اللى فى قلبى على لسانى

لا بعرف اكدب ولا اخبى

والصبر مخلوق علشانى

اتهان .. يتوجع قلبى

وتملى .. انا اللى .. بصالح

انا اصلى مواطن صالح

صابر

كادح

رايح .. فى المترو مزنوق

شايل على كتفى عذابى

ينهشنى مليون خاذوق

والفرح ميدقش بابى

اتداس او اموت محروق

وانا لسه فى عز شبابى

او اعيش حلمى مسروق

واتحمل وارضى واسامح

انا اصلى مواطن صالح

صابر

كادح

واقف ع الرزق طابور

مستنى الحظ يجبنى

جوايا شىء مكسور

مقهور وطالع عينى

ومجاش عليا الدور

والحظ تملى ناسينى

فى ساقية عمرى بدور

وبكره زى امبارح

انا اصلى مواطن صالح

صابر

كادح

شاطح حلمى لفوق

مع انى تحت اللى تحت

اصحى ع الوهم و افوق

واندم انى سرحت

ويموت حلمى مخنوق

لا فرحت

ولا عمرى ارتحت

واكمنى راجل ذوق

الصبر جوايا طارح

انا اصلى مواطن صالح

صابر

كادح

سابح فى بحر هموم

بكافح .. بعزم ما فيا

واكمنى معرفش اعوم

الموج بيلعب بيا

وطوق نجاتى مخروم

غرق الف وميه

انا لو اغرق كل يوم

تلقانى ع الوش طافح

انا اصلى مواطن صالح

صابر

كادح

شغال عبد المأمور

مسالم ماشى فى حالى

لا اعرف اشجب ولا اثور

وتملى بقول وانا مالى

بتنحنح وبقول داستور

واحترم الدستور العالى

ممثل و حافظ الدور

مشهور فى كل المسارح

انا اصلى مواطن صالح

صابر

كادح

رافض اشوف الحقيقه

مستنى منها اشاره

اتوه فى بحار غريقه

انا و حلمى فى العباره

او حتى فى الدويقه

ومن فوقى الف حجاره

هموت بأى طريقه

والعدم ع اللى رايح

انا اصلى مواطن صالح

صابر

كادح

ماليش فى الانتخابات

تملى ببايع الريس

بعد الشر لو هو مات

اسمع ان ابنه كويس

دى مظاهر وشكليات

الشعب فقرى مفلس

واللى جاى زى اللى فات

وكفايه كده فضايح

انا اصلى مش مواطن صالح